آئی ایم ایف، عالمی بینک حکام سے مفیدبات چیت کی ہے : وزیرخزانہ

تفصیلات کے مطابق واشنگٹن میں پریس کانفرنس سے خطاب کرتے ہوئے وزیر خزانہ نے کہا کہ انہوں نے اپنی اقتصادی ٹیم کے ہمراہ آئی ایم ایف، عالمی بینک اور آئی ایف سی حکام سے مفیدبات چیت کی ہے ۔ 

انہوں نے کہا کہ موجودہ حکومت آئی ایم ایف کے ساتھ گزشتہ حکومت کی جانب سے کئے گئے تمام وعدے پورے کرے گی۔

وزیر خزانہ نے کہا کہ پاکستان گزشتہ ستر برسوں میں کبھی دیوالیہ نہیں ہوا اور مستقبل میں بھی نہیں ہو گا۔ بجٹ خسارے کی بلند شرح کے باعث قرضوں میں اضافہ ہوا۔

انہوں نے کہا کہ موجودہ حکومت مجموعی ملکی پیداوار میں اضافہ کر کے قرضوں کا بوجھ کم کرنے کی بھرپور کوشش کریگی ۔ 

انہون ںے کہا کہ لنگرخانوں کی طرح کارخانوں کی تعداد بڑھائیں گے، کارخانوں کی تعداد اس لیے بڑھائیں گے تاکہ لنگرخانے کم ہوں، عمران خان حکومت نے جو معاہدے کیے وہ نبھانے کے پابند ہیں کیونکہ معاہدے عمران خان کے نہیں حکومت پاکستان کے ہیں۔

ایک سوال کے جواب میں انہوں نے کہا کہ پاکستان موجودہ معاشی صورتحال کے باعث پیٹرولیم مصنوعات پر مزید سبسڈی کا متحمل نہیں ہو سکتا۔