پنجاب اسمبلی کا اجلاس 16 مئی صبح 11 بجے تک ملتوی

لاہور: سپیکر پنجاب اسمبلی پرویز الہٰی نے آج بلایا جانے والا پنجاب اسمبلی کا اجلاس 16 مئی صبح 11 بجے تک ملتوی کر دیاہے ۔

تفصیلات کے مطابق آج سپیکر پنجاب اسمبلی پرویز الہٰی نے ڈپٹی سپیکر کے خلاف عدم اعتماد پر ووٹنگ کروانے کیلئے اجلاس طلب کیا تھا ، لیکن سپیکر کی جانب سے اجلاس ملتوی کرنے کا فیصلہ اس وقت سامنے آیا جب اسمبلی کے سیکریٹری کو آرڈی نیشن عنایت اللہ کو گرفتار کیا گیا جبکہ سیکریٹری پنجاب اسمبلی اس وقت لاہور ہائیکورٹ میں ہیں جہاں ان کی گرفتاری کا بھی امکان ظاہر کیا جارہاہے ، اس صورتحال کو مد نظر رکھتے ہوئے اجلاس کو ملتوی کر دیا گیا ۔

ڈپٹی سپیکر کے خلاف 6 اپریل کو عدم اعتماد کی تحریک جمع کروائی گئی تھی جس پر آج ووٹنگ ہونا تھی ، حکومت اور اپوزیشن اپنی تیاری مکمل کر چکی تھیں اور اراکین کو بھی اسمبلی پہنچنے کی ہدایت کر دی گئی تھی ۔سپیکر اور ڈپٹی سپیکر کے خلاف تحریک عدم اعتماد جمع ہوئے 14 روز سے زائد وقت گزر چکا ہے لیکن ابھی تک ووٹنگ نہیں ہو سکی ہے ۔