شمالی وزیرستان : فوجی چوکی پر دہشتگردوں کا حملہ ، پاک فوج کا سپاہی شہید

پاک فوج کے شعبہ تعلقات عامہ( آئی ایس پی آر ) کے مطابق  ضلع شمالی وزیرستان کے قصبہ دتہ خیل کے جنرل علاقے میں یکم اور 2جون کی درمیانی رات فوجی چیک پوسٹ پر دہشت گردوں کی فائرنگ سے پاک فوج کا جوان حامد علی شہید ہوگیا۔

دہشت گردوں کی فائرنگ پر پاک فوج کے  دستوں نے فوری جوابی کارروائی شروع کی اور دہشت گردوں کے ٹھکانے کو مؤثر طریقے سے نشانہ بنایا، تاہم شدید فائرنگ کے تبادلے میں سپاہی حامد علی (عمر 28 سال، ساکن سرگودھا) بہادری سے لڑتے ہوئے شہید ہوگیا۔

ترجمان پاک فوج کے مطابق فائرنگ کے بعد علاقے کا گھیراؤ کرکے دہشت گردوں کے خلاف سرچ آپریشن جاری ہے۔

آئی ایس پی آر کا کہنا ہے کہ پاک فوج دہشت گردی کی لعنت کے خاتمے کے لیے پرعزم ہے،ہمارے بہادر جوانوں کی ایسی قربانیاں رائیگاں نہیں جائیں گی ۔