منی لانڈرنگ کیس : مونس الہٰی  کی عبوری ضمانت میں توسیع

تفصیلات کے مطابق لاہور کی بینک عدالت  میں  مسلم لیگ (ق) کے رہنما مونس  الٰہی کے خلاف 24ارب کی  منی لانڈرنگ کے کیس کی  سماعت  ہوئی جس سلسلے میں لیگی رہنما سمیت شریک ملزمان محمد خان بھٹی اور واجد احمد عدالت کے روبرو پیش ہوئے۔

بینکنگ کورٹ لاہور میں پنجاب اسمبلی کے اسپیکر چوہدری پرویز الہٰی کے بیٹے  مونس الٰہی اور دیگر ملزمان ضمانت میں توسیع کے لیے پیش ہوئے ،  دوران سماعت ایف آئی اے نے عدالت میں بیان دیا کہ ملزم کیس میں شامل تفتیش ہوگئے ہیں اور کیس کا 47 فیصد ریکارڈ آچکا ہے،  ہم واؤچرزدیکھ رہے ہیں، تفتیش مکمل کرنے کے لیے وقت درکار ہے۔

عدالت نے ایف  آئی اے کے بیان پر  کہا کہ عبوری ضمانت کو غیر معینہ مدت تک التوا میں نہیں رکھ سکتے، اگلی تاریخ تک تفتیش مکمل ہونی چاہیے، ملزمان کے وکیل تیاری کرکےآئیں۔

بعد ازاں عدالت نے مونس الٰہی اور دیگر ملزمان کی عبوری ضمانت میں 14 جولائی تک توسیع کردی۔

واضح رہے کہ مونس الہٰی پر وفاقی تحقیقاتی ادارے (ایف آئی اے) نے 24 ارب روپے کی منی لانڈرنگ کا الزام لگایا ہے۔

خیال رہے کہ گزشتہ سماعت میں لاہور کی بینکنگ عدالت نے مونس الہٰی کی 4 جولائی تک عبوری ضمانت منظور کرتے ہوئے ان کو شاملِ تفتیش ہونے کی ہدایت کی تھی۔