گال ٹیسٹ : پاکستان کوجیت کیلئے 508 رنز کا ہدف

تفصیلات کے مطابق پاکستان اور سری لنکا کے درمیان کھیلے جا رہے دوسرے ٹیسٹ میچ میں میزبان ٹیم نے اپنی دوسری اننگز 360 رنز پر ڈکلیئر کردی اور پاکستان کو جیت کے لیے 508 رنز کا ہدف دے دیا۔

میزبان ٹیم نے دوسری اننگز میں 7 وکٹوں کے نقصان پر 297 رنز بنالیے ، اس444 رنز کی برتری حاصل ہو گئی۔

سری لنکا کی طرف سے کپتان دیمتھ کرونا رتنے 61 اور اینجیلو میتھیوز 35 رنز بنا کر نمایاں رہے جبکہ دننجیا ڈی سلوا 84 رنز بنا کر وکٹ پر موجود ہیں۔

قومی ٹیم کی جانب سے نسیم شاہ اور محمد نواز نے 2،  آغا سلمان اور یاسر شاہ نے ایک ایک وکٹ حاصل کی ہے۔

تیسرے دن کا کھیل کم روشنی کی وجہ سے وقت سے پہلے روک دیا گیا تھا، سری لنکا نے تیسرے روز کے اختتام تک 5 وکٹوں کے نقصان پر 176 رنز بنائے تھے۔

پاکستان کی پہلی اننگز

پاکستان کی پوری ٹیم پہلی اننگز میں 231 رنز پر آؤٹ ہو گئی تھی، سری لنکا کو دوسری اننگز شروع کرنے سے پہلے ہی 147 رنز کی برتری حاصل ہو گئی تھی۔

گرین کیپ کی اننگز کو کچھ سہارا سلمان آغا نے دیا، جو 62 رنز بنا کر آؤٹ ہوئے۔

قومی کی جانب سے امام الحق 32، محمد رضوان اور فواد عالم 24، 24 جبکہ کپتان بابر اعظم 16 رنز بنا کر آؤٹ ہوئے۔

سری لنکا کی طرف سے رمیش مینڈس نے 5 اور پراباتھ جے سوریا نے 3 وکٹیں حاصل کیں جبکہ اسیتھا فرنینڈو اور دننجیا ڈی سلوا نے ایک ایک کھلاڑی آؤٹ کیا۔

سری لنکا کی پہلی اننگز

واضح رہے کہ پاکستان کے خلاف سیریز کے دوسرے اور آخری ٹیسٹ میں سری لنکن ٹیم پہلی اننگز میں 378 رنز بنا کر آؤٹ ہو گئی تھی۔

چندی مل 80 رنز کے ساتھ ٹاپ اسکورر رہے، نسیم شاہ اور یاسر شاہ نے تین تین وکٹیں حاصل کیں۔