وفاقی کابینہ نے بھارت سے کپاس ،چینی درآمد کرنے کی تجویز مسترد کردی

تفصیلات کے مطابق   وفاقی کابینہ کا اجلاس وزیراعظم عمران خان کی زیرصدارت ہوا۔ اجلاس میں بھارت سے کپاس اور چینی  منگوانے کا معاملہ زیر بحث آیا ہے۔ اقتصادی رابطہ کمیٹی(ای سی سی) نے گزشتہ روز بھارت سے کپاس اور چینی   منگوانے کی منظوری دی تھی  ۔اس حوالے سے  وزارت تجارت حکام کا کہنا تھا کہ   پاکستان کو کمی پورا کرنےکے لیےکپاس درآمد کرنا پڑتی ہے،بھارت سے کپاس اور یارن کی درآمد سستی پڑے گی، کپاس کی پیداوار میں تاریخی کمی کے باعث یارن پر بھی دباؤ پڑا ہے۔ وفاقی کابینہ نے بھارت سے کپاس منگوانے کی مخالفت کرتے ہوئے کہا کہ ملک میں موجود وسائل سے ہی ضروریات پوری کی جائیں۔

واضح رہے کہ گزشتہ روز وزیر خزانہ حماد اظہر کی زیر صدارت  اقتصادی رابطہ کمیٹی نے بھارت سےپانچ لاکھ میٹرک ٹن  چینی، کپاس اور سوتی دھاگہ منگوانے کی اجازت دی تھی۔  کمیٹی نے نجی شعبے کو بھارت سے چینی درآمد کرنے کی بھی اجازت دی تھی۔ بھارت سے  30جون 2021ء تک کپاس اور یارن(دھاگہ)  واہگہ کے راستے یہ اشیاء درآمد کرنے کی تجویز دی گئی  تھی ۔

 خیال رہے کہ پاکستان کی اگست 2019 میں بھارت کے ساتھ دوطرفہ تجارت  معطل ہے۔