وزیراعلی ٰہاؤس خیبرپختونخوا کے 6 ملازمین کورونا کا شکار

تفصیلات کے مطابق وزیراعلیٰ  ہاؤس میں 6   ملازمین کا کورونا ٹیسٹ مثبت آنے کے بعد  تمام ملازمین کے لیے کورونا ٹیسٹ لازمی قرار دے دیا گیا ہے۔  وزیراعلیٰ   محمود خان نے معمول کی سرگرمیاں محدود کردی ہیں  جبکہ  وزیراعلیٰ سے منتخب عوامی نمائندوں کی ملاقاتیں بھی محدود کردی گئی ہیں۔ معمول کے سرکاری اجلاس ویڈیو لنک کے ذریعے کیے جائیں گے۔  وزیراعلیٰ کے پی محمود خان  کاکہنا ہے  کہ کورونا وبا کی شدت میں تشویشناک حد تک اضافہ ہو رہا ہے لہٰذا عوام احتیاطی تدابیر پر سختی سے عملدرآمد کو یقینی بنائیں اور ماسک استعمال کریں۔

اس سے قبل وزیراعلی ٰ ہاؤس میں  ایک ہفتے میں دو ملازمین کورونا سے جاں بحق ہوچکے ہیں ۔ ملک بھر میں جاری کورونا کی تیسری لہر کے دوران   خیبرپختون خوا میں کورونا وائرس سے متاثرہ مریضوں کی تعداد88 ہزار  099ہوچکی ہے  جبکہ  صوبے میں 2363افرادجان کی بازی ہار چکے ہیں ۔

واضح رہے کہ نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق گزشتہ 24 گھنٹوں میں کورونا سے مزید98 افراد چل بسے جس کے بعد اموات کی مجموعی تعداد 14 ہزار530ہوگئی ہےجبکہ ملک میں کورونا کے فعال کیسز کی تعداد 53ہزار 127ہے، اب تک کورونا کے  6 لاکھ 72ہزار 931کیسز رپورٹ ہوچکے ہیں ۔ این سی او سی کے مطابق ملک میں کورونامثبت کیسزکی شرح 9.9فیصدرہی ۔