ڈسکہ انتخابات :پی ٹی آئی کی اپیل مسترد ، الیکشن کمیشن کا فیصلہ برقرار

تفصیلات کے مطابق سپریم کورٹ میں  ڈسکہ میں دوبارہ انتخابات کے الیکشن کمیشن کے حکم کیخلاف اپیل پر فیصلہ سنا دیا،  سپریم کورٹ میں این اے 75 ڈسکہ میں دوبارہ انتخابات کے معاملے کی سماعت ہوئی ، جسٹس عمر عطاء بندیال کی سربراہی میں تین رکنی بنچ نے مختصر فیصلہ  سنایا، ورانِ سماعت جسٹس عمر عطاء بندیال نے کہا کہ قانونی نکات بیان کریں جو ضروری نوعیت کے ہیں، صرف ان دستاویزات پر انحصار کریں جن پر الیکشن کمیشن نے فیصلہ دیا۔  سپریم کورٹ نے پی ٹی آئی کے علی اسجد  ملہی کی اپیل خارج کردی ۔ سپریم کورٹ نے الیکشن کمیشن کا فیصلہ برقرار رکھتے ہوئے 10اپریل کو پورے حلقے میں دوبارہ پولنگ کا حکم دے دیا۔ 

خیال رہے کہ الیکشن کمیشن نے این اے 75 ڈسکہ میں 10 اپریل کو ضمنی الیکشن کرانے کا شیڈول جاری کیا تھا۔الیکشن کمیشن نے اس سے قبل ضمنی انتخاب کیلئے 18 مارچ  کی تاریخ دی گئی تھی۔

واضح رہے الیکشن کمیشن نے این اے 75  ڈسکہ کے ضمنی  انتخاب کو کالعدم قرار دیتے ہوئے پورے حلقے میں دوبارہ الیکشن   کرانے کا حکم دیا تھا۔   الیکشن کمیشن فیصلے میں کہا گیا ہے کہ حلقے میں ضمنی انتخاب شفاف نہیں ہوا، انتخابی ماحول خراب کیاگیا اور لڑائی جھگڑے کے واقعات ہوئے، ووٹرزکوووٹ ڈالنے کیلئےبہترماحول نہیں ملا اور تمام پولنگ اسٹیشن پردوبارہ پولنگ ہوگی ۔ جبکہ  تحریک انصاف کے امیدوار نے الیکشن کمیشن کےفیصلے کو عدالت میں چیلنج کیا تھا۔