بلوچستان : بارشوں اور سیلاب کی تباہ کاریاں ، اموات کی تعداد 278 ہوگئی

پرووینشل ڈیزاسٹر مینجمنٹ  اتھارٹی ( پی ڈی ایم اے ) کی جاری کردہ رپورٹ کے مطابق گزشتہ 24 گھنٹوں میں سیلاب کے نتیجے میں ہونے والے حادثات میں مزید8 اموات رپورٹ ہوئیں ۔ ضلع جھل مگسی میں   جاں بحق افراد میں 6 مرد اور 2 خواتین شامل ہیں ۔ 

بلوچستان میں یکم جون سے اب تک جاں بحق ہونے والوں کی تعداد 278  تک پہنچ گئیں  ،جاں بحق ہونے والوں میں 132 مرد 63 خواتین اور83 بچے شامل ہیں۔

صوبے میں بارشوں کے دوران مختلف حادثات میں 172 افراد زخمی ہوچکے ہیں۔ 

 سیلابی ریلوں اور بارشوں سے مجموعی طور پر بلوچستان میں 64 ہزار 385 مکانات نقصان کا شکار ہوئے  جبکہ  2 لاکھ 70 ہزار 444 سے زائد مال مویشی سیلابی ریلوں کی نذر ہوگئے ہیں۔

پی ڈی ایم اے کی رپورٹ کے مطابق اب تک مجموعی طور پر دو لاکھ ایکڑ زمین پر کھڑی فصلوں کو نقصان پہنچا ہے ۔ صوبے میں سیلابی ریلوں میں 22  پل گر گئے  جبکہ2 ہزار 200 کلو میٹر پر مشتمل مختلف شاہراہیں بھی شدید متاثر ہوئیں۔