شہر قائد میں پارہ 44ڈگری کو چھو گیا

محکمہ موسمیات کے مطابق شہرقائد  آج بھی بدترین گرمی کی لپیٹ میں ہے اور درجہ حرارت 44 ڈگری سینٹی گریڈ تک جا پہنچا ہے۔ محکمہ موسمیات کے ریکارڈ کے مطابق 14 اپریل 1947ء کو درجۂ حرارت 44 اعشاریہ 4 ڈگری سینٹی گریڈ ریکارڈ کیا گیا تھا۔ محکمہ موسمیات کا کہنا ہےکہ شہر میں شام سے سمندری ہوائیں بحال ہونے کا امکان ہے جس کے بعد درجہ حرارت میں کمی واقع ہوسکتی ہے۔ کراچی میں کل سے گرمی کی شدت میں کمی آنے کا امکان ہے، اتوار کو پارہ 36 سے 38 ڈگری کے درمیان رہنے کا امکان ہے، جبکہ پیر کو زیادہ سے زیادہ درجۂ حرارت 34 سے 36 ڈگری کے درمیان رہنے کی توقع ہے۔

محکمۂ موسمیات کا کہنا ہے کہ شہر میں شمال مشرقی سمت سے ہلکی رفتار سے ہوائیں چل رہی ہیں، جن میں نمی کا تناسب 5 فیصد ہے۔ محکمہ موسمیات نے شہریوں کو خبردار کیا ہے  کہ شہری آج شام 4 بجے تک دھوپ سے بچنے کی حتی الامکان کوشش کریں، غیر ضروری طور پر گھروں سے باہر نہ نکلیں۔ محکمۂ موسمیات نے شہریوں کو ہدایت کی ہے کہ انتہائی ضرورت کے تحت گھروں سے نکلتے وقت پانی اور گیلا کپڑا ساتھ رکھیں، وقفے وقفے سے پانی پیتے رہیں، سر اور چہرے کو ڈھک کر رکھیں، ہلکے رنگ کے کپڑے پہنیں۔