پاکستان نے بھارتی وزیراعظم کے غیرقانونی زیرقبضہ جموں وکشمیر بارے بیان کو مسترد کردیا

تفصیلات کے مطابق آج  ایک بیان میں دفتر خارجہ نے کہا کہ بھارتی وزیراعظم کا یہ مضحکہ خیز بیان کہ انہوں نے کسی نہ کسی حد تک مسئلہ کشمیر حل کردیا ہے  نہ صرف جھوٹا اور گمراہ کن ہے بلکہ اس بات کا بھی مظہر ہے کہ بھارتی قیادت بھارت کے غیرقانونی زیر تسلط جموں و کشمیر کے زمینی حقائق سے کتنی بے خبر ہے۔

 بیان میں کہا گیا ہے کہ جموں و کشمیر عالمی سطح پر ایک تسلیم شدہ تنازعہ ہے جو1948 سے اقوام متحدہ کے ایجنڈے پر حل طلب ہے۔

 اقوام متحدہ کی واضح قراردادوں کے باوجود جس میں تنازعے کے حتمی حل کیلئے آزادانہ اور غیر جانبدارانہ رائے شماری کیلئے کہاگیا ہے ، بھارت نے نہ صرف علاقے پر غیرقانونی طور پر قبضہ کیا بلکہ اس نے انسانی حقوق کی سنگین خلاف ورزیوں کا بھی ارتکاب کیا اور 9 لاکھ سے زائد ظالم فورس کو بھی تعینات کیا ہے۔