بس آتشزدگی سانحہ : وزیراعظم کا قیمتی جانوں کے ضیاع پر اظہار افسوس

تفصیلات کے مطابق سماجی رابطے کی ویب سائٹ ٹوئٹر پر پیغام میں وزیراعظم  شہباز شریف نے کہا کہ میں نوری آباد کے قریب سپر ہائی وے پر بس کو آگ لگنے کے واقعہ میں قیمتی جانوں کے ضیاع پرشدید دکھی ہوں۔

انہوں نے اللہ تعالیٰ سے دعا کی کہ وہ اس حادثے میں وفات پا جانے والے لوگوں کو اپنے جوار رحمت میں جگہ دے ، غمزہ خاندانون کو صبر جمیل عطا کرے اور زخمیوں کو جلد صحتیابی دے۔

گزشتہ رات موٹر وے ایم نائن پر نوری آباد کے قریب کراچی سے ناتھن شاہ جانے والی کوچ میں آگ لگنے کے باعث 18 افراد جھلس کر جاں بحق ہو گئے۔ جاں بحق  افراد  میں 8 بچے اور 9 خواتین شامل ہیں ، جبکہ حادثے میں 2 افراد زخمی بھی ہوئے ہیں۔

 جاں بحق افراد  کی میتیں سہراب گوٹھ ایدھی سرد خانے سے آبائی علاقے روانہ کر دی گئیں۔

جاں بحق اور زخمی افراد کراچی میں منگھو پیر بند مراد کے علاقے سے اپنے آبائی گاؤں جا رہے تھے ، موٹر وے پولیس کے مطابق حادثے کا شکار بس میں 55 افراد سوار تھے۔