پاکستان کبھی فلسطینیوں کو نہیں بھول سکتا: وزیر اعظم شہباز شریف

وزیر اعظم شہباز شریف سے فلسطین کے صدر محمود عباس نے قازقستان میں ملاقات کی۔ دونوں قائدین میں جذباتی گفتگو ہوئی جو اسلامی اخوت اور بھائی چارے کی مثال بن گئی۔ وزیر اعظم اور فلسطینی صدر ایک دوسرے سے گرمجوشی سے بغل گیر ہوئے۔

وزیر اعظم شہباز شریف اور فلسطینی صدر محمود عباس میں دلچسپ مکالمہ بھی ہوا جبکہ فلسطینی صدر نے فرط جذبات سے وزیر اعظم کے دونوں ہاتھ اپنے ہاتھوں میں تھام لیے۔

وزیر اعظم شہباز شریف نے فلسطینی صدر سے کہا کہ سیلاب کے دوران آپ کی مدد کے لیے بے حد شکر گزار ہوں۔

فلسطینی صدر محمود عباس نے کہا کہ پاکستان ہمارا گھر ہے اور پاکستانی ہمارے بھائی، بہنیں ہیں۔ پاکستانی ہمارے گھر کے لوگ ہیں اور ہم نے اُن کے لیے کچھ بھی نہیں کیا۔

شہباز شریف نے کہا کہ ایسا نہ کہیں، فلسطین نے سیلاب زدگان کی جس طرح مدد کی ہم بھول نہیں سکتے اور پاکستان کبھی فلسطینیوں کو بھول نہیں سکتا۔ آپ کی کامیابی تک پاکستان آپ کے حق کے لیے آواز بلند کرتا رہے گا۔

محمود عباس نے کہا کہ ہم پاکستان کو کبھی بھی نہیں بھولتے جبکہ مفتی فلسطین اپنی وفات تک پاکستان میں رہے اور ان کی دیکھ بھال پاکستان نے کی۔ قیام پاکستان سے پہلے سے ہم پاکستانیوں کے ساتھ ہیں۔

وزیر اعظم نے کہا کہ فلسطین ہمارے ایمان و یقین کا حصہ ہے اور فلسطین ہمارے دل میں ہے۔ آج کی کانفرنس میں پاکستان کی حمایت کرنے والے رہنماؤں میں آپ شامل ہیں اور آپ کی حمایت اور جذبے پر دل کی گہرائیوں سے شکریہ ادا کرتا ہوں۔