امریکی ریاست شمالی کیرولینا میں فائرنگ : 5 افراد ہلاک 

خبر رساں ادارے کے مطابق رالی کی میئر میری این بالڈون کا کہنا ہے کہ فائرنگ کا واقعہ ایک ہائکنگ ٹریل پر پیش آیا جہاں لوگ اکثر تفریح کے لیے جاتے ہیں۔

واقعہ جمعرات کی شام پانچ بجے پیش آیا ہے اور متعدد افراد فائرنگ  کا نشانہ بنے۔ 

میڈیا ررپورٹس کے مطابق ہلاک ہونیوالوں  میں ایک پولیس افسر بھی شامل ہے جبکہ  متعدد زخمی ہیں ، پولیس نے ملزم کو حراست میں لے لیا ہے ۔

عینی شاہدین کے مطابق حملہ آور نے کیموفلاج کرنے والے کپڑے پہن رکھے تھے،ملزم نے کئی مقامات پر فائرنگ کی ۔ 

خیال رہے کہ فائرنگ کے اکثر پیش آنے والے واقعات امریکہ کے لیے ایک بڑا مسئلہ بن گیا ہے جس سے صرف سال  2022 میں ہی 34 ہزار افراد ہلاک ہو چکے ہیں ۔ ان میں نصف سے زیادہ وہ افراد ہیں جنہوں نے اسلحے کا استعمال کرتے ہوئے خودکشی کرلی ۔ 

حال ہی میں امریکی ریاست ٹیکساس کے سکول اور امریکی ریاست نیو یارک کے شہر بفیلو کی ایک سپر مارکیٹ میں ہونے والے فائرنگ کے واقعات سے ملک بھر میں غم و غصے کی لہر دوڑ گئی تھی جس کے بعد 30 سال میں پہلی مرتبہ امریکی قانون سازوں نے اسلحے کی فروخت پر قابو پانے کی غرض سے اصلاحات پر اتفاق کیا ہے۔