پاکستانی سفارتخانے کی انتھک کوششوں سے سوڈان سے ایک ہزار پاکستانیوں کا بحفاظت انخلا عمل میں لایا گیا ہے، دفتر خارجہ

اسلام آباد: دفتر خارجہ نے کہا ہے کہ سوڈان سے ایک ہزار پاکستانیوں کا اللہ کے فضل وکرم اور خرطوم میں پاکستانی سفارتخانے کی انتھک کوششوں سے بحفاظت انخلا عمل میں لایا گیا ہے۔

دفتر خارجہ نے منگل کو ایک بیان میں کہا کہ سوڈان میں پاکستان کے سفیر میر بہروز ریگی کی قیادت میں پاکستانیوں کے انخلاءکے عمل کو سعودی عرب اور چین کی مدد کے ساتھ ساتھ جدہ اور اسلام آباد میں ہماری ٹیموں کا تعاون حاصل رہا جس کے نتیجے میں ہم نے کامیابی سے بحفاظت ایک ہزار پاکستانیوں کا سوڈان سے انخلا عمل میں لایا ہے۔

دفتر خارجہ کے مطابق اس کے ساتھ ہی سوڈان سے ہمارے انخلا کی کارروائیاں ختم ہوگئی ہیں۔ بیان میں مزید کہا گیا ہے کہ آخری پاکستانی کی بحفاظت واپسی تک جدہ کے راستے انخلا کا عمل جاری رہے گا۔