اوگرا نے پیٹرول کی قیمتوں میں کمی کی تجویز دے دی

اسلام آباد: آئل اینڈ گیس ریگولیٹری اتھارٹی (اوگرا) نے جمعرات کو حکومت پاکستان کو پیٹرولیم مصنوعات کی قیمتوں میں کمی کے حوالے سے سمری ارسال کی ہے۔

تفصیلات کے مطابق پیٹرول کی قیمت میں 5 سے 10 روپے فی لیٹر کمی کی تجویز دی گئی ہے۔ جبکہ ڈیزل کی قیمت میں بھی 10 روپے فی لیٹر کمی متوقع ہے۔

اس وقت پیٹرول 262 روپے فی لیٹر جبکہ ڈیزل کی قیمت 253 روپے فی لیٹر ہے۔

ذرائع نے بتایا کہ سمری میں یہ بھی کہا گیا ہے کہ اگر لیوی بڑھانے کی ضرورت پڑی تو ریٹ بھی وہی رہ سکتے ہیں۔

آج وفاقی وزیر خزانہ اور سینیٹر اسحاق ڈار حتمی فیصلے کے لیے وزیراعظم شہباز شریف سے مشاورت کریں گے جس کا اعلان آج رات 12 بجے کیا جائے گا۔ نئی قیمتوں کا اطلاق اگلے پندرہ دن تک ہوگا۔

واضح رہے کہ گزشتہ دو ہفتوں کے دوران برینٹ آئل مارکیٹ میں خام تیل کی قیمت زیادہ سے زیادہ 76 ڈالر فی بیرل رہی جو کم سے کم 70 ڈالر تک پہنچ گئی۔