تین روزہ پی ایس بی ریفریشر کوچنگ کورس (بدھ سے )کوئٹہ میں شروع ہو گا

اسلام آباد: پاکستان سپورٹس بورڈ کے زیر اہتمام تین روزہ پی ایس بی ریفریشر کوچنگ کورس (کل )بدھ سے کوئٹہ میں شروع ہو گا۔ یہ کورس وفاقی وزیر بین الصوبائی رابطہ احسان الرحمان مزاری اور پاکستان سپورٹس بورڈ کے ڈائریکٹر جنرل شعیب کھوسہ کی ہدایت پر منعقد کیا جارہا ہے۔

کورس کے شرکاء کو پاکستان سپورٹس بورڈ کے ڈپٹی ڈائریکٹر جنرل شاہد اسلام اور ورلڈ اتھلیٹکس لیول ٹو لیکچرار و پاکستان سپورٹس بورڈ کے انسٹریکٹر نصراللہ رانا کے علاوہ دیگر مقررین کھیلوں کے حوالے سے مختلف امور پر لیکچرز دیں گے۔ جن میں کوچنگ اور ٹریننگ کے نظریات،غذائیت، ڈوپنگ، کھیلوں کی نفسیات، کھیلوں کے دوران زخم، چوٹیں اور ابتدائی طبی امداد اور ہنر کی تعلیم پر لیکچرز شامل ہیں۔

اس سے قبل اسلام آباد، لاہور،فیصل آباد، پشاور، کراچی اور راولاکوٹ میں بھی کورسز منعقد ہو چکے ہیں جبکہ کوئٹہ میں 21 سے 23 جون تک منعقد ہوگا۔