بلوچستان کے نئے نامزد گورنر شیخ جعفر خان مندوخیل نے اپنے عہدے کا حلف اٹھا لیا۔

بلوچستان ہائی کورٹ  کے چیف جسٹس محمد ہاشم کاکڑ نے گورنر سے اپنے عہدے کا حلف لیا۔

حلف برداری کی تقریب میں سبکدوش ہونے والے گورنر ملک عبدالولی کاکڑ اور وزیراعلیٰ سرفراز بگٹی نے بھی شرکت کی۔

اس کے علاوہ صوبائی وزراء، اراکین صوبائی اسمبلی (ایم پی اے)، سیاسی شخصیات اور عہدیداروں نے بھی تقریب میں شرکت کی۔

واضح رہے کہ شیخ جعفر خان مندوخیل بلوچستان کے 24ویں گورنر بن گئے ہیں۔

واضح رہے کہ صدر آصف علی زرداری نے آئین کے آرٹیکل 101 (اے) کے تحت سردار سلیم حیدر خان کو گورنر پنجاب، فیصل کریم کنڈی کو خیبرپختونخوا اور جعفر خان مندوخیل کو بلوچستان کا گورنر بنانے کی منظوری دی تھی۔

رحیم یار خان کی کچہ ماچھکہ میں پولیس آپریشن، مزید ایک ڈاکو ہلاک، تعداد 04 ہو گئی،

ترجمان پنجاب پولیس کے مطابق  رحیم یار خان کی کچہ ماچھکہ میں شر گینگ کے ٹھکانوں پر ٹارگٹڈ کاروائیاں جاری ہیں جس کے تحت خطرناک ڈاکو فاروق شر بھی پولیس آپریشن میں ہلاک ہو گیا۔

پنجاب پولیس نے گذشتہ روز 03 خطرناک ڈاکوؤں عالم شر، نزیر شر اور حاکم شر کو کیفر کردار تک پہنچایا  جبکہ آپریشن کے دوران 07 ڈاکو زخمی ہو گئے تھے۔

ڈی پی او رحیم یار خان رضوان گوندل کے مطابق پنجاب پولیس نے شر گینگ کے ٹھکانوں کو بھاری اسلحہ سے نشانہ بنایا۔ آپریشن میں پنجاب پولیس بکتر بند گاڑیوں، بھاری اسلحہ اور جدید ٹیکنالوجی سے استفادہ کر رہی ہے۔

کچہ ماچھکہ میں شر گینگ کے ٹھکانوں کو ڈرون فوٹیج میں نذر آتش ہوتا دیکھا جا سکتا ہے، ڈی پی او رضوان گوندل  

سعودی عرب کے نائب وزیر سرمایہ کاری ابراہیم بن یوسف المبارک نے کہا ہے کہ سعودی عرب پاکستان کو سرمایہ کاری کیلئے انتہائی موزوں ملک سمجھتا ہے۔

اسلام آباد میں دو روزہ پاکستان سعودی عرب سرمایہ کاری کانفرنس سے خطاب کرتے ہوئے سعودی نائب وزیر سرمایہ کاری نے کہا کہ سعودی حکومت اور کمپنیاں پاکستان کو اقتصادی ، سرمایہ کاری اور کاروباری حوالے سے ترجیح دیتی ہیں۔ پاکستان اور سعودی عرب کے درمیان نجی و سرکاری شعبے میں شراکت دار کو بلندیوں تک لے جانا چاہتے ہیں۔

سعودی عرب کے نائب وزیر سرمایہ کاری 50 رکنی وفد کے ہمراہ پاکستان کے دورے پر ہیں۔ ان کے وفد میں ٹیکنالوجی، ٹیلی کام، توانائی، ایوی ایشن، مائننگ، زراعت اور ہیومن ریسورس ڈویلپمنٹ کے شعبوں کی کمپنیوں کے نمائندگان شامل ہیں۔

انہوں نے مزید کہا کہ بڑی تعداد میں پاکستانی سعودی عرب کی ترقی میں کردار ادا کر رہے ہیں اور سعودی عرب پاکستان کو سرمایہ کاری کیلئے انتہائی موزوں ملک سمجھتا ہے۔

سعودی عہدیدار نے کہا کہ اُن کا ملک پاکستان کی اقتصادی صلاحیت بشمول اس کی ڈیموگرافی، محل وقوع اور قدرتی وسائل پر یقین رکھتا ہے اور پاکستان سعودی عرب کے لیے مرکزی علاقائی شراکت دار ہے۔

مشترکہ مذہب، ثقافت اور اقدار کا حوالہ دیتے ہوئے اُنہوں نے کہا کہ ہم پاکستان کو سرپرستی کرنے والے بین الاقوامی شراکت دار کے طور پر دیکھنا چاہتے ہیں۔ سعودی عرب تقریباً 20 لاکھ پاکستانیوں کا گھر ہے جنہوں نے سعودی عرب کے ویژن 2030 میں نمایاں کردار ادا کیا ہے۔

انہوں نے اس اعتماد کا اظہار کیا کہ دونوں ممالک کے سرکاری اور نجی شعبے اپنی شراکت داری کو آگے لے جا سکتے ہیں۔