جسٹس مسرت ہلالی نے سپریم کورٹ کے جج کی حیثیت سے حلف اٹھا لیا

جسٹس مسرت ہلالی نے سپریم کورٹ کے جج کی حیثیت سے حلف اٹھا لیا، چیف جسٹس آف پاکستان عمر عطاء بندیال نے مسرت ہلالی سے حلف لیا۔

حلف برداری کی تقریب میں سیئر وکلا، اٹارنی جنرل سمیت دیگر اہم شخصیات نے شرکت کی۔ جسٹس مسرت ہلالی کی حلف برداری کے بعد سپریم کورٹ کے ججز کی تعداد 16 ہو گئی ہے۔مسرت ہلالی جسٹس عائشہ ملک کے بعد سپریم کورٹ کی دوسری خاتون جج ہیں۔ جسٹس مسرت ہلالی 3 سال تک سپریم کورٹ کے جج کے طور پر خدمات ادا کریں گی۔ 

 اعلیٰ عدلیہ کے ججز کی تقرری سے متعلق پارلیمانی کمیٹی نے جسٹس مسرت ہلالی کو سپریم کورٹ کا جج تعینات کرنے کی منظوری دی تھی۔

یکم اپریل کو جسٹس مسرت ہلالی نے پشاور ہائیکورٹ کی قائم مقام چیف جسٹس کا حلف لیا تھا، جس کے بعد وہ خیبرپختونخوا کی تاریخ میں اس عہدے پر پہنچنے والی پہلی خاتون بن گئی تھیں۔

گزشتہ ماہ صدر مملکت ڈاکٹر عارف علوی نے پشاور ہائیکورٹ میں بطور قائم مقام چیف جسٹس کی ذمہ داریاں ادا کرنے والی جسٹس مسرت ہلالی کی آئین کے آرٹیکل 175 اے (13) کے تحت بطور چیف جسٹس پشاور ہائیکورٹ تعیناتی کی منظوری دی تھی۔

جسٹس مسرت ہلالی نے خیبر لاء کالج سے قانون کی ڈگری حاصل کی اور 1983 میں وکالت کا آغاز کیا۔ انہوں نے 1988 میں ہائیکورٹ، جبکہ 2006 میں سپریم کورٹ کا لائسنس بھی حاصل کر لیا، 1988 میں جسٹس مسرت ہلالی پشاور بار کی پہلی خاتون سیکریٹری منتخب ہوئیں۔ 1992 سے 1994 تک بار کی نائب صدر رہیں، جبکہ 1997 میں دوسری بار سیکریٹری منتخب ہوئیں

جسٹس مسرت ہلالی سال 2001 بطور ایڈیشنل ایڈووکیٹ جنرل خیبرپختونخوا تعینات ہوئیں۔2013 میں وہ پشاور ہائی کورٹ کی ایڈیشنل جج تعینات ہوئیں اور 2014 میں مستقل جج بن گئیں۔