فواد چوہدری کے خلاف سرکاری ملازمین کو اکسانے کے کیس کی سماعت

ڈسٹرکٹ اینڈ سیشن کورٹ اسلام آباد میں واد چوہدری کے خلاف سرکاری ملازمین کو اکسانے کے کیس کی سماعت ہوئی، کورٹ نے فواد چودھری کے خلاف فرد جرم عائد کرنے کی کارروائی ایک بار پھر مؤخر کر دی۔ ایڈیشنل سیشن جج طاہرعباس سپرا نے کیس کی سماعت کی جس کے دوران فواد چودھری عدالت پیش ہوئے۔

جج طاہر عباس سپرا نے فواد چوہدری کو دیکھ کر ریمارکس دیئے کہ موسم اچھا ہو گیا ہے جس پر فواد چوہدری کا کہنا تھا کہ موسم تو اچھا ہو گیا ہے لگے ہوئے ہیں ہم بھی۔

فواد چودھری کے وکیل فیصل چودھری نے کہا کہ آج عدالت میں 265 سی کی درخواست دائر کر رہے ہیں، ہمیں تا حال کیس سے متعلق مکمل دستاویزات فراہم نہیں کی گئیں،کیس کی  کیس کی دستاویزات مہیا کرنے کی درخواست دائر کر دی گئی، مکمل دستاویزات کی فراہمی ملزم کا حق ہوتا ہے۔

پراسیکیوٹر نے عدالت کو بتایا کہ ہمارے پاس اس وقت کیس کی فائل موجود نہیں، کیس کی فائل دیکھ کر ہی کوئی بیان دے سکتا ہوں۔

فواد چودھری کے وکیل فیصل چودھری نے استدعا کی کہ اگلی سماعت کی کوئی لمبی تاریخ دے دیں، 10 محرم کے بعد کی تاریخ دے دیں۔

بعدازاں ایڈیشنل سیشن جج طاہر عباس سپرا نے درخواست پر فریقین کو نوٹس جاری کر دیا اور فواد چودھری کے خلاف فرد جرم کی کارروائی ایک با رپھر مؤخر اور کیس کی سماعت 14 جولائی تک ملتوی کر دی