سندھ میں نگراں حکومت کی تشکیل ،پی ٹی آئی کے اپوزیشن لیڈر سے مشاورت ختم کرنے کی تیاری

سندھ اسمبلی میں اپوزیشن لیڈر کی تبدیلی کےلئے عملی منصوبہ تیار کر لیا گیا۔ سندھ میں نگراں حکومت کی تشکیل میں پی ٹی آئی کے اپوزیشن لیڈر کی مشاورت ختم کرنے کی تیاری کی جا رہی ہے۔

سندھ اسمبلی کے کل کے ہونے والے اجلاس کےلئے ایم کیو ایم نے ہوم ورک مکمل کر لیا ہے۔ پاکستان تحریک انصاف کے رہنما حلیم عادل شیخ کی جگہ ایم کیو ایم کا رکن صوبائی اسمبلی اپوزیشن لیڈر بنے گا۔ ایم کیو ایم کے علی خورشیدی یا رعنا انصاف کے ایک مہینے کےلئے اپوزیشن لیڈر بننے کے امکانات نظر آ رہے ہیں۔

صوبے میں اپنی مرضی کی نگراں حکومت بنانے کے لئے سندھ حکومت نے اپوزیشن لیڈر تبدیل کرنے کا فیصلہ کر لیا، اس مقصد کے لئے پیپلز پارٹی اور ایم کیو ایم میں غیر اعلانیہ مفاہمت ہو گئی ہے.

سندھ اسمبلی کا بدھ سے شروع ہونے والا سیشن اس لحاظ سے اہمیت کا حامل ہے کہ اس اجلاس میں سندھ اسمبلی میں نئے لیڈر آف دی اپوزیشن کی تبدیلی کا قوی امکان ہے کیونکہ 9مئی کے واقعات کے بعد سے حلیم عادل شیخ ایوان سے مسلسل غیر حاضر ہیں اور سندھ اسمبلی کے اجلاس میں شریک نہیں ہورہے ہیں  اس لئے ایم کیو ایم کی طرف سے کوشش کی جا رہی ہے کہ ان کا رکن اپوزیشن لیڈر بنے. پی ٹی آئی کے تین منحرف ارکان کے علاوہ باقی تمام دوسرے ارکان سندھ اسمبلی بھی ایوان سے غائب ہیں۔

ذرائع کے مطابق پیپلز پارٹی نے بھی گرین سگنل دے دیا ہے اور ایم کیو ایم کے اپوزیشن لیڈر کی تعیناتی کے بعد سندھ میں نگراں حکومت متحدہ قومی موومنٹ اور پیپلز پارٹی کی مشاورت سے لائی جائے گی۔