بنگلہ دیش نے پہلے ٹی ٹوئنٹی میں افغانستان کو دو وکٹوں سے شکست دے دی

سلہٹ: بنگلہ دیش نے افغانستان کو پہلے ٹی ٹوئنٹی انٹرنیشنل میں سنسنی خیز مقابلے کے بعد دو وکٹوں سے شکست دے دی، میزبان ٹیم کو آخری اوور میں 155 رنز کا ہدف ملا۔

جمعہ کو سلہٹ انٹرنیشنل کرکٹ سٹیڈیم میں کھیلے گئے پہلے ٹی ٹوئنٹی میچ میں بنگلہ دیش کے کپتان شکیب الحسن نے ٹاس جیت کر پہلے فیلڈنگ کا فیصلہ کیا۔

افغانستان نے مقررہ 20 اوورز میں سات وکٹوں کے نقصان پر 154 رنز بنائے۔

محمد نبی نے 40 گیندوں پر 54 رنز کی ناقابل شکست اننگز کھیلی۔ عظمت اللہ عمرزئی نے 33 اور نجیب اللہ زدران نے 23 رنز بنائے۔

بنگلہ دیشی بولر شکیب الحسن نے دو وکٹیں حاصل کیں۔ جبکہ نسیم احمد، تسن احمد، شریف الاسلام، مستفیض الرحمان اور مہدی حسن نے ایک ایک وکٹ حاصل کی۔

بنگلہ دیش نے افغانستان کا 155 رنز کا ہدف ایک دلچسپ مقابلے کے بعد آخری اوور میں چھ وکٹوں کے نقصان پر حاصل کر لیا۔

ہدف کے تعاقب میں بنگلہ دیش کی شروعات مایوس کن رہی کیونکہ اس کے پہلے چار بلے باز 64 کے مجموعی سکور پر آؤٹ ہو گئے۔

اس موقع پر توحید ہریدوئے اور شمیم حسین نے 73 رنز کی شاندار شراکت قائم کر کے اپنی ٹیم کی فتح میں اہم کردار ادا کیا۔ توحید 47 رنز کے ساتھ ناٹ آؤٹ رہے جبکہ شمیم حسین 33 رنز کے ساتھ آؤٹ ہوئے۔

میچ کے آخری اوور میں بنگلہ دیش کو جیت کے لیے چھ رنز درکار تھے جب افغان باؤلر کریم جنت نے شاندار ہیٹ ٹرک کر کے میچ کو مزید سنسنی خیز بنا دیا تاہم شریف الاسلام نے آخری اوور کی پانچویں گیند پر چوکا لگا دیا۔

بنگلہ دیش کے توحید ہریدوئے کو ان کی شاندار اننگز پر میچ کا بہترین کھلاڑی قرار دیا گیا۔ اس فتح کے بعد بنگلہ دیش نے دو میچوں کی ٹی ٹوئنٹی سیریز میں 1-0 کی برتری حاصل کر لی ہے۔