کراچی کے صارفین کے لیے بجلی کے نرخوں میں اضافہ

اسلام آباد: نیشنل الیکٹرک پاور ریگولیٹری اتھارٹی (نیپرا) نے کے الیکٹرک صارفین کے لیے بھی بجلی کی قیمت میں اضافہ کردیا۔

تفصیلات کے مطابق نیپرا نے کے الیکٹرک صارفین کے لیے بجلی کی قیمت میں 1 روپے 44 پیسے فی یونٹ اضافہ کر دیا ہے۔

کے الیکٹرک صارفین کے لیے مئی کی فیول ایڈجسٹمنٹ کی مد میں بجلی کی قیمتوں میں اضافہ کیا گیا ہے۔

نیپرا کے مطابق جولائی کے بل میں صارفین سے اضافی رقم وصول کی جائے گی جس کا نوٹیفکیشن جاری کر دیا گیا ہے۔

بجلی کے بنیادی نرخوں میں اضافہ
وفاقی حکومت نے بجلی کے بنیادی نرخوں میں 4 روپے 96 پیسے فی یونٹ اضافے کا فیصلہ کیا ہے۔

حکومتی فیصلے کے بعد بجلی کی فی یونٹ اوسطاً 50 روپے سے تجاوز کرنے کا امکان ہے۔

یہ بھی بتایا گیا ہے کہ نیپرا کی جانب سے بجلی کی قیمت میں اضافے کا باضابطہ اعلان آج (ہفتہ) کو کیے جانے کا امکان ہے۔

اس وقت پورے ملک میں بجلی کا بنیادی ٹیرف 24.82 روپے ہے جب کہ گزشتہ مالی سال بجلی کا بنیادی ٹیرف 16.91 روپے سے بڑھا کر 24.82 روپے پر طے کیا گیا تھا۔