سول جج کی اہلیہ کے خلاف ملازمہ پر تشدد کا مقدمہ درج

اسلام آباد: سول جج عاصم حفیظ کی اہلیہ صومیہ کے خلاف 14 سالہ گھریلو ملازمہ رضوانہ کو مبینہ طور پر تشدد کا نشانہ بنانے کا مقدمہ درج کرلیا گیا۔

رپورٹس کے مطابق مقدمہ نوجوان ملازم کے والد کی مدعیت میں اسلام آباد کے ہمک تھانے میں درج کیا گیا۔

فرسٹ انفارمیشن رپورٹ (ایف آئی آر) میں بتایا گیا ہے کہ 14 سالہ رضوانہ 10 ہزار روپے ماہانہ تنخواہ پر 6 ماہ سے سول جج عاصم حفیظ کی گھریلو ملازمہ تھی۔

درج مقدمے کے مطابق سول جج کی اہلیہ کے تشدد سے لڑکی کا دانت، ناک، بازو اور پسلیاں ٹوٹ گئیں۔ سومیا نے لڑکی کو لاٹھیوں اور چمچوں سے تشدد کا نشانہ بنایا، ڈنڈوں سے اس کی کمر پر گہرے زخم لگائے جبکہ سول جج کی اہلیہ نے مبینہ طور پر لڑکی کا گلا گھونٹ دیا جس کے واضح نشانات ہیں۔

قبل ازیں متاثرہ لڑکی کے والدین کا کہنا تھا کہ 14 سالہ بیٹی کو مختار نامی شخص نے چھ ماہ قبل سول جج عاصم حفیظ کے گھر کام کرنے کے لیے بھیجا تھا۔

والدین کا کہنا تھا کہ جج کی اہلیہ نے لڑکی پر زیورات چوری کرنے کا الزام لگا کر بلے سے تشدد کیا۔ لڑکی کی حالت خراب ہونے پر اس نے اسے اس کی ماں کے حوالے کر دیا۔ بچی کو تشویشناک حالت میں سرگودھا سے لاہور منتقل کر دیا گیا ہے اور وہ جنرل ہسپتال میں زیر علاج ہے۔

اسپتال انتظامیہ کا کہنا ہے کہ اس کے جسم پر تشدد کے پرانے نشان ہیں جو بروقت علاج نہ ہونے کی وجہ سے بگڑ گئے۔ لڑکی کی ٹانگیں فریکچر ہیں اور اس کے سر پر بھی چوٹ آئی ہے۔

نگراں وزیر صحت ڈاکٹر جاوید اکرم نے متاثرہ لڑکی کی عیادت کی۔ انہوں نے کہا کہ رضوانہ کو 6 ماہ تک وحشیانہ تشدد کا نشانہ بنایا گیا، ملزمان کے خلاف قانون کے مطابق کارروائی کی جائے گی۔