عمران خان کے خلاف اڈیالہ جیل میں سائفر کیس کی سماعت شروع ہوگئی

راولپنڈی: پاکستان تحریک انصاف (پی ٹی آئی) کے چیئرمین عمران خان کے خلاف آفیشل سیکرٹ ایکٹ کے تحت سائفر کیس کی سماعت بدھ کو اڈیالہ جیل راولپنڈی میں شروع ہوگئی۔

تفصیلات کے مطابق کیس کی سماعت جج ابوالحسنات محمد ذوالقرنین کررہے ہیں۔ سماعت کے حوالے سے 12 وکلا کو اڈیالہ جیل میں داخل ہونے کی اجازت دی گئی ہے۔

بیرسٹر سلمان صفدر، سردار لطیف کھوسہ، راجہ یاسر، نعیم حیدر پنجوٹھہ، بیرسٹر عمیر خان نیازی، چوہدری خالد یوسف، نیاز اللہ خان نیازی، رائے محمد علی، لال عمر بودلہ، جواد اصغر، علی اعجاز بٹر کو اڈیالہ جیل میں داخلے کی اجازت دے دی گئی۔

خیال رہے کہ چیئرمین پی ٹی آئی کے خلاف توہین عدالت کیس کی سماعت اڈیالہ جیل میں کرنے کا نوٹیفکیشن جاری کردیا گیا تھا۔

وفاقی حکومت کے اسپیشل پراسیکیوٹر ذوالفقار عباسی بھی اڈیالہ جیل پہنچ گئے ہیں۔

پی ٹی آئی کے وائس چیئرمین شاہ محمود قریشی کے وکلاء بیرسٹر تیمور ملک، علی بخاری، بیٹے زین قریشی اور بیٹی مہر بانو بھی اڈیالہ جیل میں موجود ہیں۔

وزارت قانون نے اڈیالہ جیل میں سائفر کیس کی سماعت کے لیے این او سی جاری کردیا جب کہ فیڈرل انویسٹی گیشن ایجنسی (ایف آئی اے) نے سائفر کیس کا آفیشل سیکرٹ ایکٹ چالان عدالت میں جمع کرا دیا۔

چالان کی کاپیاں آج سابق وزیراعظم عمران خان اور سابق وزیر خارجہ شاہ محمود قریشی کے وکلا کو فراہم کی جائیں گی۔