افغانستان میں آج پھر 6.4 شدت کا زلزلہ

کابل: افغانستان میں 6.4 شدت کا زلزلہ ریکارڈ کیا گیا ہے۔

روسی خبر رساں ادارے کے مطابق یورپی بحیرہ روم کے زلزلہ پیما مرکز نے بتایا کہ بدھ کی صبح افغانستان میں زلزلے کے جھٹکے محسوس کیے گئے ہیں جن کی شدت ریکٹر سکیل پر 6.4 ریکارڈ کی گئی ہے۔

زلزلے کا مرکز ملک کے تیسرے بڑے شہر ہرات سے 34 کلومیٹر شمال مغرب میں 10 کلومیٹر گہرائی میں تھا۔

تاحال کسی جانی و مالی نقصان کی اطلاع موصول نہیں ہوئی۔ واضح رہے کہ افغانستان کے صوبہ ہرات میں 7 اکتوبر کو آنے والے 6.3 شدت کے زلزلے سے اموات 3 ہزار کے قریب پہنچ گئی ہیں۔