امریکی صدر نے ایک بار پھر فلسطین پر بمباری اسرائیل کا حق قرار دے دیا

واشنگٹن: اسرائیل پر حماس کے حملوں کے بعد امریکی صدر جو بائیڈن نے ایک بار پھر فلسطین پر اسرائیلی جارحیت اور بمباری کو اسرائیل کا حق اور فرض قرار دے دیا۔

تفصیلات کے مطابق امریکی صدر نے اسرائیل کو اپنی حمایت کا یقین دلاتے ہوئے کہا کہ جواب دینا اور حملے کرنا اسرائیل کا حق اور فرض ہے، امریکا اس بات کو یقینی بنائے گا کہ اسرائیل اپنا دفاع کر سکے۔

امریکی صدر جو بائیڈن نے بھی اسرائیل میں حماس کے حملوں کے دوران 14 امریکی شہریوں کی ہلاکت کی تصدیق کی ہے۔

دوسری جانب اسرائیلی وزیراعظم بنیامین نیتن یاہو نے امریکی صدر جو بائیڈن سے ٹیلی فون پر بات چیت کے دوران حماس کے حملوں کے بعد کی صورتحال پر تبادلہ خیال کیا۔

اسرائیلی وزیراعظم نے کہا کہ حماس جیسے حملے ہولوکاسٹ کے بعد کبھی نہیں دیکھے گئے۔