سعودی عرب کی پاکستان میں 3 ارب ڈالر کے ڈپازٹ کی مدت میں توسیع

اسٹیٹ بینک آف پاکستان کا کہنا ہے کہ سعودی عرب نے ملکی کی معیشت کو استحکام دینے کے لیے پاکستان میں موجود اپنے 3 ارب ڈالر کے ڈپازٹ کی مدت میں مزید ایک سال کی توسیع کر دی ہے۔

اسٹیٹ بینک کی جانب سے جاری بیان میں کہا گیا کہ سعودی فنڈ برائے ڈویلپمنٹ (ایس ایف ڈی) نے مملکت سعودی عرب کی جانب سے 05 دسمبر 2023ء کو مدت مکمل کرنے والے 3 ارب ڈالر کے ڈپازٹ کی مدت میں مزید ایک سال کی توسیع کر دی ہے۔

2/2 The continuation of this support by the Kingdom of Saudi Arabia will help Pakistan maintain forex reserves and boost its economic growth.
For details, see PR: https://t.co/njGE5hN0DW

— SBP (@StateBank_Pak) November 29, 2023

یہ رقم اسلامی جمہوریہ پاکستان کی جانب سے اسٹیٹ بینک آف پاکستان (ایس بی پی) میں جمع ہے۔

اسٹیٹ بینک کا کہنا ہے کہ ڈپازٹ کی مدت میں توسیع مملکت سعودی عرب کی جانب سے اسلامی جمہوریہ پاکستان کو فراہم کی جانے والی معاونت کا تسلسل ہے، جس سے پاکستان کے زر مبادلہ کے ذخائر کو بر قرار رکھنے اور ملک کی معاشی ترقی میں مدد ملے گی۔

یہ بات قابل ذکر ہے کہ 3 ارب ڈالر کے اس ڈپازٹ معاہدے پر ابتدائی طور پر سال 2021ء میں ایس ایف ڈی کے ذریعے اسٹیٹ بینک آف پاکستان کے ساتھ دستخط کیے گئے تھے اور پھر شاہی فرمان جاری ہونے کے بعد 2022ء میں اس کا اجرائے ثانی ہوا تھا جو دونوں برادر ممالک کے درمیان قریبی تعلقات کے تسلسل کا عکاس ہے۔