تارکین وطن کی کشتی ڈوب گئی ، 61 افراد جاں بحق

تارکین وطن کو غیر قانونی طور پر یورپ لے جانے والی کمزور کشتی لیبیا کے ساحل میں اونچی لہروں کے تھپیڑے نہ برداشت کرسکی اور ڈوب گئی۔

اقوام متحدہ کے ادارے کا کہنا ہے کہ لیبیا کے شمال مغربی ساحل زوارا سے روانہ ہونے والی کشتی میں 86 تارکین وطن سوار تھے جن کا تعلق نائجیریا، گیمبیا اور دیگر افریقی ممالک سے تھا۔ ان میں خواتین اور بچے بھی شامل تھے۔ لیبیا کے ساحل پر کشتی ڈوبنے سے 86 تارکین وطن لاپتا ہوگئے جن میں سے صرف 25 کو زندہ بچایا جاسکا۔

کوسٹ گارڈ کے اہلکاروں نے ڈوبنے والی کشتی کے 25 تارکین وطن کو زندہ نکال لیا تاہم 61 کا کچھ پتا نہ چل سکا۔ سخت موسم اور طغیانی کے باعث بقیہ کے زندہ ملنے کی امید ختم ہوگئی۔