سابق چیئرمین پی ٹی آئی کی توہین الیکشن کمیشن کیس کا فوری جیل ٹرائل روکنے کی استدعا مسترد

سابق چیرمین پی ٹی آئی کی توہین الیکشن کمیشن کیس کا فوری جیل ٹرائل روکنے کی استدعا مسترد کر دی گئی۔

لاہور ہائی کورٹ میں جسٹس عالیہ نیلم کی سربراہی میں تین رکنی بنچ نے سابق وزیراعظم کے جیل ٹرائل کے خلاف درخواست پر سماعت کی۔ دوران سماعت الیکشن کمیشن کے وکیل نے ہوم ڈیپارٹمنٹ کے جیل ٹرائل کے نوٹیفکیشن سے متعلق فل بنچ کو آگاہ کر دیا۔

عدالت نے ریمارکس دیئے کہ یہ کیس تو اسلام آباد یا پنڈی بینچ میں ہونا چاہیے تھا، جائزہ لے لیتے ہیں کہ کیس پرنسپل سیٹ پر کیسے منتقل ہوا۔

وکیل الیکشن کمیشن نے کہا کہ جیل ٹرائل کا نوٹیفکیشن ہوم ڈیپارٹمنٹ نے 8 دسمبر کو جاری کیا، اس پر عدالت نے کہا کہ ملزم اڈیالہ جیل روالپنڈی میں ہے، اس عدالت کا دائرہ اختیار اسلام آباد اور راولپنڈی کا ہے۔

وکیل نے کہا کہ درخواست گزار جب لاہور میں تھا اس وقت نوٹسز زمان پارک میں وصول کروائے گئے، البتہ کیس کل سابق چیئرمین پی ٹی آئی پر فرد جرم عائد کرنے کے لیے فکس ہے۔

بعدازاں لاہور ہائی کورٹ نے بانی پی ٹی آئی کی توہین الیکشن کمیشن کیس میں جیل ٹرائل روکنے کی فوری استدعا مسترد کرتے ہوئے الیکشن کمیشن سمیت دیگر کو نوٹسز جاری کر کے جواب طلب کر لیا۔