عالمی برادری بھارت کے غیر منصفانہ فیصلوں کا نوٹس لے ، مشعال ملک

وزیر انسانی حقوق اور  معاونِ خصوصی مشعال ملک نے عالمی برادری کو مخاطب کرتے ہوئے کہا کہ وہ بھارت کے ملک سے باہر پھیلتے ہوئے دہشت گردی کے نیٹ ورک کا نوٹس لے۔

انہوں نے مقبوضہ کشمیرپر بات کرتے ہوئےکہا کہ بھارتی سپریم کورٹ کے فیصلے سے کشمیریوں کے جذبے کم نہیں ہوں گے بلکہ کشمیر کی اس آزادی کی تحریک کو مزید بڑھاوا ملے گا ۔ 

انہوں نے کہا کہ بھارتی فیصلوں سے لگتاہے کہ بھارت کو کشمیر کی آزادی سے خوف ہے ، اور بھارت اس خوف کو لے کر انصاف کے تقاضوں کو بھول گیا ہے ۔ 

انہوں نے ایک نجی چینل کے پروگرام میں  کہا کہ امریکہ، کینیڈا، متحدہ عرب امارات اور دوسرے ملکوں میں عالمی دہشت گردی کے حالیہ واقعات سے ظاہر ہوتا ہے کہ بھارتی حکومت کی آر ایس ایس کے زیر قیادت ہندوتوا کے نظریے سے عالمی امن کو شدید خطرات لاحق ہیں۔

انہوں نے کہا کہ عدم برداشت کے اس نظریے نے پورے بھارت کو یرغمال بنا رکھا ہے۔

مشعال حسین ملک نے کہاکہ مقبوضہ کشمیر میں بھارتی مظالم کی تحقیقات کیلئے بین الاقوامی جنگی ٹربیونل قائم کئے جانے چاہئیں۔

انہوں نے کہا کہ بھارتی حکومت غیر کشمیریوں کو ڈومیسائل فراہم کر کے بھارت کے غیر قانونی زیر قبضہ جموں و کشمیر کی ثقافت اور آبادی کا تناسب تبدیل کرنے کی کوشش کر رہی ہے۔

انہوں نے مزید کہا کہ بھارت میں مذہبی اقلیتیں خصوصاً مسلمان آر ایس ایس کے غنڈوں سے محفوظ نہیں ہیں جسے حکمرانوں کی طرف سے کھلی چھوٹ دی گئی ہے۔