ملک میں عام انتخابات کیلئے امیدواروں کو کاغذات نامزدگی کل سے شروع

ملک میں عام انتخابات 2024ء کیلئے امیدواروں کو کاغذات نامزدگی کل سے جاری کئے جائیں گے جو بدھ سے جمع کرائے جا سکیں گے۔

قومی اسمبلی کے کاغذات نامزدگی کے ساتھ سکیورٹی فیس 30 ہزار جبکہ صوبائی اسمبلی کے ساتھ 20 ہزار روپے جمع کرانا ہو گی۔ الیکشن کمیشن کی جانب سے جاری کئے گئے شیڈول کے مطابق آئندہ عام انتخابات کے انعقاد کیلئے تیاریاں زور و شور سے جاری ہیں۔ انتخابی عملے کی ٹریننگ کا اختتام منگل کو ہو گا جبکہ اسی روز ریٹرننگ افسران کی جانب سے پبلک نوٹس کا اجراء کیا جائے گا۔

ترجمان الیکشن کمیشن کے مطابق امیدواروں کی جانب سے کاغذات نامزدگی 20 سے 22 دسمبر تک جمع کرائے جا سکیں گے جن کی ابتدائی فہرست 23 دسمبر کو جاری کی جائے گی۔ ریٹرننگ افسران کی جانب سے کاغذات نامزدگی کی جانچ پڑتال 24 سے 30 دسمبر تک ہو گی جبکہ کاغذات نامزدگی منظور یا مسترد کئے جانے کے خلاف اپیلیں 3 جنوری 2024 کو دائر کی جا سکیں گی

ترجمان کا کہنا تحا کہ اپیلوں پر اپیلٹ ٹربیونل کی جانب سے فیصلے 10 جنوری تک کئے جائیں گے۔ امیدواروں کی نظرثانی شدہ فہرست 11 جنوری کو جاری کی جائے گی۔ کاغذات نامزدگی 12 جنوری کو واپس لئے جا سکیں گے جبکہ اسی روز امیدواروں کی نظرثانی شدہ فہرست جاری کی جائے گی۔ امیدواروں کو انتخابی نشانات کی الاٹمنٹ 13 جنوری کو کی جائے گی جبکہ پولنگ 8 فروری 2024ء کو ہو گی۔