صدر مملکت اور وزیر اعظم کی کرسمس پر مسیحی برادری سے اظہار یکجہتی

صدر مملکت ڈاکٹر عارف علوی اور وزیراعظم انوار الحق کاکڑ نے کرسمس کے موقع پر مسیحی برادری کو دلی مبارکباد پیش کی ہے۔کرسمس کے موقع پر اپنے پیغام میں صدر مملکت نے کہا کہ پاکستان میں اقلیتوں کو آئین پاکستان کے تحت تمام سیاسی، معاشی اور سماجی حقوق حاصل ہیں۔انہوں نے کہا کہ حکومت تمام شہریوں کے لئے کسی رنگ ونسل اور عقیدے سے قطع نظر یکساں مواقع کی فراہمی یقینی بنارہی ہے۔

انہوں نے اس عزم کا اظہار کیا کہ حکومت پاکستان میں تمام مذہبی اقلیتوں کے حقوق کا تحفظ یقینی بنانے کے لیے پرعزم ہے۔

انہوں نے کہا کہ پاکستان ہمارا گھر ہے اور اس موقع پرہمیں عہد کرنا چاہیے کہ ہم مل کر پاکستان کو مذہبی رواداری اور بھائی چارے کا نمونہ بنائیں گے۔

اس موقع پر اپنے پیغام میں وزیراعظم نے کہا کہ کرسمس محبت، بھائی چارے، صبر اور ایثار کا نام ہے اور یہی وہ اقدار ہیں جو معاشرے کو ترقی کی راہ پر گامزن کرنے کے لئے ضرو ری ہیں۔

اطلاعات ونشریات کے نگران وزیر مرتضی سولنگی نے کہا ہے کہ پاکستان کا آئین مسیحی برادری سمیت تمام اقلیتوں کے حقوق کے تحفظ کی ضمانت دیتا ہے۔ کرسمس کے موقع پر مسیحی برادری کو مبارکباد پیش کرتے ہوئے مرتضی سولنگی نے کہا مسیحی برادری نے ہمیشہ پاکستان کی ترقی اور خوشحالی میں اہم کردار ادا کیا ہے۔