آرمی چیف کا راولپنڈی میں کرائسٹ چرچ میں تقریب سے خطاب

آرمی چیف  جنرل سید عاصم منیر نے معاشرے میں بین المذاہب ہم آہنگی کو بڑے پیمانے پر فروغ دینے پر زور دیا ہے جس کا مقصد قائد کے ایک متحد اور ترقی پسند پاکستان کے حقیقی نظریے کی پیروی کرنا ہے۔

انہوں نے  کرسمس کی تقریبات میں مسیحی برادری کے ساتھ شامل ہونے کے لئے آج راولپنڈی میں کرائسٹ چرچ کے دورے کے موقع پر خطاب کرتے ہوئے کہا ہمیں قائد اعظم محمد علی جناح کے نظریے کو آگے لے کر چلنا ہے ۔ 

تقریب کے شرکاء نے آرمی چیف کا خیرمقدم کیا اور ان کی خوشی میں شریک ہونے پر آرمی چیف کا شکریہ ادا کیا۔

چیف آف آرمی سٹاف نے مسیحی برادری کیلئے احترام ظاہر کیا اور کہا کہ اسلام ہمیں امن اور دوستی کا درس دیتا ہے اور بین المذاہب ہم آہنگی کی حوصلہ افزائی کرتا ہے جو وقت کی ضرورت ہے۔

انہوں نے قومی مسائل کے بارے میں درست انداز فکر اختیار کرنے کی ضرورت پر زور دیا جو حقیقت پسندی اور معلومات پر مبنی ہو تاکہ مشکل حالات اور مسائل سے نمٹا جا سکے۔

آرمی چیف  نے کہا کہ پاکستان کے دشمن ہماری مذہبی، نسلی اور سیاسی کمزوریوں سے فائدہ اٹھا کر ہم میں پھوٹ ڈالنے پر تلے ہوئے ہیں۔ انہوں نے کہا کہ ہمیں ایک پرعزم اور مضبوط قوم کی حیثیت سے ابھرنے کیلئے متحد رہنا ہو گا۔

قائداعظم محمد علی جناح کے ایک سو سینتالیسویں یوم ولادت پر ان کی قائدانہ صلاحیتوں اور بصیرت کو زبردست خراج تحسین پیش کرتے ہوئے انہوں نے گیارہ اگست 1947کو آئین ساز اسمبلی سے خطاب میں قائداعظم کے ان تاریخی کلمات کا ذکر کیا جن میں وہ کہتے ہیں کہ تم آزاد ہو۔ تمہیں مندروں میں جانے کی اجازت ہے، تمہیں مسجدوں میں جانے یا مملکت پاکستان کی کسی بھی دوسری عبادت گاہ میں جانے کی آزادی ہے۔