بلاول بھٹو کے کاغذات نامزدگی کی منظوری کا تحریری حکم نامہ جاری

لاہور: لاہور کے حلقہ این اے 127 سے پاکستان پیپلز پارٹی (پی پی پی) کے چیئرمین بلاول بھٹو زرداری کے کاغذات نامزدگی کی منظوری کا تحریری فیصلہ جاری کر دیا گیا۔

تفصیلات کے مطابق ریٹرننگ آفیسر (آر او) نے چار صفحات پر مشتمل تحریری فیصلہ جاری کردیا۔

فیصلے میں کہا گیا ہے کہ دو سیاسی جماعتوں سے الحاق کا معاملہ الیکشن کمیشن آف پاکستان (ای سی پی) کو بھیجا جائے، اس لیے شکایت کنندہ محمد ایاز متعلقہ فورم سے رجوع کریں۔

ریٹرننگ افسر نے بتایا کہ شکایت کنندہ ایاز کا تعلق این اے 127 سے نہیں، وہ نارووال کا رہائشی ہے، فیصلے میں کہا گیا کہ شکایت کنندہ محمد ایاز کے اعتراضات کو مسترد کر دیا گیا ہے۔

واضح رہے کہ بلاول بھٹو کے کاغذات نامزدگی دو سیاسی جماعتوں سے وابستگی کے باعث مسترد کیے جانے کی درخواست کی گئی تھی۔