وزیراعلیٰ پنجاب سے جہانگیر ترین گروپ کے وفد کی ملاقات، عثمان بزدار پر اعتماد کا اظہار

تفصیلات کے مطابق وزیراعلی  پنجاب سے ملاقات کرنے والوں میں سعید اکبر نوانی، اجمل چیمہ، نعمان لنگڑیال،زوار وڑائچ، نذیر چوہان، عمر آفتاب اور عون چودھری    شامل تھے۔ عثمان بزدار سے ملاقات کے موقع پر سعید اکبر نوانی نے کہا کہ آپ کی قیادت پر پورا اعتماد ہے، آپ ہماے وزیراعلیٰ ہیں، اپنے ایشوز کے حل کے لیے آئے ہیں، تحریک انصاف سے غیر مشروط وابستگی برقرار رہے گی۔ وزیراعلیٰ پنجاب نے کہا کہ میرے دروازے آپ سب کے لیے کھلے ہیں، کبھی کسی سے ناانصافی کی، نہ کریں گے، انتقام کی سیاست ہمارا شیوہ نہیں۔ آپ کے جائز تحفظات کا ازالہ کیا جائے گا ۔ہماری پارٹی کا نام تحریک انصاف ہے اور ہم انصاف کی عمل داری پر یقین رکھتے ہیں۔

جہانگیر ترین گروپ کے نعمان لنگڑیال نے میڈیا سے گفتگو کرتے ہوئے کہا کہ پی ٹی آئی میں تھے اور پی ٹی آئی میں ہی رہیں گے، ہمیں امید ہے تمام مسائل حل ہوں گے، وزیراعظم نے وعدہ کیا ہے جہانگیر ترین سے نا انصافی نہیں ہوگی، علی ظفر پر بھی اعتماد کا اظہار کرتے ہیں۔ جہانگیر ترین کیخلاف انویسٹی گیشن چل رہی ہے ، ہم سے وعدہ کیا گیا تھا کہ ترین کیساتھ نا انصافی نہیں ہو گی ، وزیراعلیٰ نے مسائل کے حل کی یقین دہانی کرائی ہے ، پنجاب کے عوام کیلئے ایسا بجٹ لائیں گے کہ ان کو فائدہ ہو۔

سعید اکبر نوانی کا کہنا تھا کہ ہم نے کہا ہے بجٹ میں عوام کو زیادہ سے زیادہ ریلیف دیں، اپنے حلقے کے مسائل سے بھی آگاہ کیا ہے، وزیراعظم نے کہا ہے نا انصافی نہیں ہوگی، انکوائری رپورٹ ہمارے خلاف بھی آئی تو قبول کریں گے، ہم چاہتے ہیں رپورٹ میں ناانصافی نہیں ہونی چاہیئے ۔ تحریک انصاف ہماری جماعت ہے اور اس جماعت سے غیر مشروط وابستگی برقرار رہے گی۔

علاوہ ازیں ترین گروپ کے تحفظات دور  کرنے کے لیے وزیر اعلی نے موقع پر احکامات جاری کر دئیے ، ترین گروپ کے تمام ارکان کو ترقیاتی فنڈ ز ملیں گے ،بیورو کریسی ترین گروپ کے تمام جائز مسائل حل کرے گی ۔ترین گروپ بجٹ منظور کروانے سمیت تمام حکومتی اقدامات کو سپورٹ کرے گا ،ترین گروپ پارٹی ڈسپلن کو فالو کرے گا  اور ترین گروپ ٹاک شوز میں کوئی متنازع گفتگو نہیں کرے گا۔