190 ملین پاؤنڈ کیس، ملزمان کے اثاثے اور بینک اکائونٹس منجمد

احتساب عدالت اسلام آباد نے 190 ملین پاؤنڈ کرپشن کیس میں پی ٹی آئی کے اشتہاری قرار دیئے گئے ملزمان کے اثاثے اور بینک اکائونٹس منجمد کر دیئے ہیں۔

احتساب عدالت کے جج محمد بشیر نے ملک ریاض، علی ریاض،زلفی بخاری، شہزاد اکبر، فرحت شہزادی عرف فرح گوگی اور ایک وکیل ضیاء المصطفیٰ نسیم کی جائیدادیں بھی منجمد کرنے کا حکم دیا۔

احتساب عدالت اسلام آباد نے اشتہاری ملزمان کے دائمی وارنٹ گرفتاری بھی جاری کر دیئے، ملزمان کے نام رجسٹرڈ گاڑیاں بھی ضبط کرنے کی ہدایت جاری کی گئی ہے، ایکسائز اینڈ ٹیکسیشن افسران کو ان کے ناموں پر رجسٹرڈ گاڑیاں ضبط کرنے کا حکم دے دیا گیا ہے۔

عدالت نے ملک بھر کے ریونیو افسران کو ملزمان کی غیر منقولہ جائیدادیں ضبط کرنے کا حکم دینے کے ساتھ کمرشل بینکوں کو ہدایت کی ہے کہ وہ ان کے کھاتوں کو منجمد کریں اور لین دین یا سرمایہ نکالنے کی اجازت نہ دیں۔