صدر مملکت کا خصوصی افرادکیلئے ملازمتوں کے کوٹے پر عملدرآمدکا اعلان

صدرڈاکٹر عارف علوی نے خصوصی افراد کو بااختیار بنانے کے لئے ہر سرکاری سطح پر ملازمتوں میں ان کے کوٹہ پر عملدرآمد کروانے کا حکم دیا  ہے۔

منگل کے روز لاہور میں ایک اجلاس کی صدارت کرتے ہوئے انہوں نے تجویز پیش کی کہ سرکاری محکموں کو خصوصی افراد کے لئے ملازمتوں کی نشاندہی کرنی چاہئے اور افرادی قوت میں ان کی شمولیت بڑھانے کے لئے ملازمتیں فراہم کرنی چاہئیں۔

صدر مملکت  نے کہا کہ خصوصی افراد ملکی آبادی کا تقریباً بارہ فیصد ہیں اور ملازمتوں میں کوٹے جیسے اقدامات انہیں روزگار کی فراہمی میں حائل رکاوٹوں کو دور کرنے میں مددگار ثابت ہو سکتے ہیں۔

انہوں نے خصوصی افراد کو روزگار کے قابل بنانے کے لئے ضروری مہارتیں سکھانے مہارت اور ان کی معذوری کے مطابق نوکریوں کی فراہمی کیلئے آجروں سے روابط پر زور دیا۔صدرمملکت  نے خصوصی افراد کے ساتھ رویوں کی تبدیلی پر بھی زور دیا تاکہ سماجی و معاشی سرگرمیوں میں موثر طور پر شرکت کیلئے ان کی حوصلہ افزائی کی جا سکے۔