پٹرولیم مصنوعات کی درآمدات میں سالانہ بنیادوں پر کمی

ملک میں پٹرولیم مصنوعات کی درآمدات میں جاری مالی سال کے پہلے 6 ماہ میں سالانہ بنیادوں پر 8فیصدکی کمی ہوئی ہے۔

او سی اے سی اور اوگرا کے اعدادوشمار کے مطابق مالی سال کے پہلے 6 ماہ میں پٹرولیم مصنوعات کی درآمدات کا حجم ایک کروڑ 18 لاکھ 48 ہزار ٹن ریکارڈ کیا گیا جو گزشتہ مالی سال کے اسی مدت کے مقابلہ میں 8فیصد کم ہے۔ گزشتہ مالی سال کی اسی مدت میں پٹرولیم مصنوعات کی مجموعی درآمدات کا حجم ایک کروڑ 28 لاکھ 26 ہزار ٹن ریکارڈ کیا گیا تھا۔

دسمبر میں پٹرولیم مصنوعات کی درآمدات کا حجم 20 لاکھ 61 ہزار ٹن ریکارڈ کیا گیا جو دسمبر 2022 کے مقابلہ میں 14 فیصد کم ہے۔ دسمبر 2022 میں ملک میں 23 لاکھ 87 ہزار ٹن پٹرولیم مصنوعات کی درآمدات ریکارڈکی گئی تھیں۔

نومبر کے مقابلہ میں دسمبر میں پٹرولیم مصنوعات کی درآمدات میں ماہانہ بنیادوں پر 4 فیصد کی کمی ہوئی ۔ نومبر میں پٹرولیم مصنوعات کی درآمدات کا حجم 20 لاکھ 69 ہزار ٹن ریکارڈ کیا گیا جو دسمبر میں کم ہو کر 20 لاکھ 61 ہزار ٹن ہو گیا۔