پاکستان کا سوئٹزرلینڈ سے تعلقات بڑھانے پر اتفاق

پاکستان اور سوئٹزرلینڈ نے باہمی دلچسپی کے تمام شعبوں میں تعاون جاری رکھنے پر اتفاق کیاہے۔

 سوئٹزر لینڈ کے شہر برن  میں پاکستان سوئٹزرلینڈ دو طرفہ سیاسی مشاورت ہو ئی جس میں فیصلہ کیا گیا کہ پاکستان اور سوئٹزرلینڈ تمام معاملات میں ایک دوسرے سے تعاون جاری رکھے گا ۔ 

پاکستان کی جانب سے ایڈیشنل سیکرٹری خارجہ یورپ ایمبیسیڈر شفقت علی خان جبکہ سوئٹزرلینڈ کے وفدکی قیادت ایشیاء اور بحرالکاہل کے لئے نائب وزیر خارجہ ہینرچ  نے کی۔

فریقین نے پاکستان اور سوئٹزرلینڈکے تعلقات کو مضبوط بنانے کے لئے دوطرفہ سیاسی مشاورت کی اہمیت کا اعادہ کیا۔ انہوں نے تجارت ، سرمایہ کاری، سیکورٹی اور نقل مکانی سمیت دوطرفہ سیاسی تعلقات کے تمام پہلوئوں پر تبادلہ خیال کیا۔

ایڈیشنل سیکرٹری خارجہ نے سوئٹزرلینڈ کے وزیر خارجہ الیگزینڈر فصیل سے بھی ملاقات کی اور موسمیاتی تبدیلی،انسانی حقوق اور ترقیاتی تعاون سمیت مختلف شعبوں میں پاکستان اور سوئٹزرلینڈ کے تعلقات مزید مستحکم کرنے پر تبادلہ خیال کیا۔