لاہور میں پی ٹی آئی کے دفتر میں آگ لگ گئی

لاہور: لاہور کے جیل روڈ پر واقع پاکستان تحریک انصاف (پی ٹی آئی) کے دفتر میں آگ بھڑک اٹھی جس کے نتیجے میں ایک شخص زخمی ہوگیا۔

زخمی شخص کو پہلے سروسز انسٹی ٹیوٹ آف میڈیکل سائنسز لاہور (سمس) اور پھر طبی امداد کے لیے جناح اسپتال منتقل کیا گیا۔

آگ لگنے سے دفتر کی کرسیاں، میز، فلیکس، ایل ای ڈی اور تمام سامان جل گیا۔ آگ بجھانے میں سات سے زائد فائر ٹینڈرز نے حصہ لیا۔

پولیس نے اس حوالے سے بتایا کہ صبح دفتر کو تالہ لگا ہوا تھا، نشے کے عادی افراد سامان چوری کرنے دفتر میں داخل ہوئے، اس دوران سگریٹ کے شعلے سے آگ بھڑکنے کا خدشہ ہے۔

پولیس کے مطابق واقعے میں جھلس کر زخمی ہونے والے یوسف مسیح کا بیان ریکارڈ کیا جائے گا جیسے ہی اس کی حالت مستحکم ہوگی۔