الیکشن 2024: این اے 127 بلاول کے مقابلے میں عطاء تارڑ کا پلڑا بھاری

لاہور: الیکشن 2024ء 8 فروری کو این اے 127 میں انتخابات میں بڑا ٹاکرا ہونے جارہا ہے جس میں پاکستان تحریک انصاف کی جانب سے ظہیر عباس کھوکھر، پیپلزپارٹی کی جانب سے بلاول بھٹو زرداری اور مسلم لیگ ن کے جانب سے عطا تارڑ شامل ہیں۔

ذرائع کے مطابق این اے127 میں ن لیگ اور پیپلزپارٹی سے درمیان مقابلے کیلئے مسلم لیگ ن حلقے میں ایک مضبوط امیدوار کے ساتھ انتخابی میدان میں جانا چاہتی ہے، اب تک ہونے والے مختلف پولز کے مطابق یہاں ن لیگ کے عطاء تارڈ کا پلڑا بھاری نظر آتا ہے۔

حلقہ این اے 127 میں بلاول بھٹو اور عطاء اللہ تارڑ کے درمیان انتہائی دلچسپ مقابلہ متوقع ہے مگر عوامی رائے اور تاریخی پس منظر کو سامنے رکھتے ہوئے مسلم لیگ ن یعنی عطا تارڑ کا پلڑا بھاری نظر آتا ہے۔

حلقے میں ووٹرز کی تعداد 5لاکھ 19 ہزار 150 ہے، این اے 127 میں صوبائی اسمبلی کے حلقے پی پی 157، 160، 161 اور 162 کے حلقے آتے ہیں۔مرد ووٹرز کی تعداد 2لاکھ 74ہزار جبکہ خواتین ووٹرز 2 لاکھ 45 ہزار سے زائد ہے۔

 یہ حلقہ ن لیگ کی قیادت کا رہائشی حلقہ ہے یہ حلقہ ماڈل ٹائون اور اس کی ملحقہ آبادیوں پر مشتمل ہے، تحریک انصاف کے حمایت یافتہ امیدوار ظہیر کھوکھر بھی یہاں سے میدان میں ہیں لیکن انہیں بلے کا انتخابی نشان نہ ہونے کی وجہ سے مشکلات کا سامنا کرنا پڑ سکتا ہے۔

عطا تارڑ کا کہنا تھا کہ یہ قلعہ ن لیگ ہے، لاہور نے برے وقت میں بھی نواز شریف کو کامیاب کرا کے اسمبلیوں تک پہنچایا۔ ان کا کہنا تھا کہ این اے 127 میں کوئی بلا تو نہیں آیا بلاول آگیا ہے۔

تینوں فریقین کے مابین مقابلہ سخت مانا جارہا تھا لیکن موجودہ حالات اور عوامی نقطہ نظر میں مقابلہ بلاول بٹھو اور عطا تارڑ کے مابین ہی دکھ رہا ہے۔

حلقہ این اے 127 کے عوام نے سروے کے دوران اپنی رائے کا اظہار کرتے ہوئے مسلم لیگ ن کے امیدوار عطا تارڑ کے حق میں ووٹ دینے کا ارادہ ظاہر کیا۔

شہریوں کا کہنا تھا کہ اگر ایک شخص چوتھی مرتبہ وزیراعظم بننے کا امیدوار ہے اور حلقے کی عوام بھی تو یقیناً انہوں نے اپنے سابقہ دور میں کام کرکے دکھایا ہے اس لیے مسلم لیگ ن کی جانب سے عطا تارڑ کو ووٹ دینگے پارٹی عوام کیلئے کام کرسکے۔

تاجر برادری کی رائے

جہاں عام آدمی مسلم لیگ ن کی حمایت میں دکھائی دیا تو دوسری جانب تاجر برداری نے بھی عطا تارڑ کی حق میں بات کرتے ہوئے کہا کہ معیشت کی موجودہ صورتحال سے نمٹنے ملک کی بھاگ دوڑ مسلم لیگ ن کی کے ہاتھ میں ہونی چاہیے۔

حلقے میں ووٹ اسے ملنا چاہیے جو عوامی مسائل کا حل کرسکے، سندھ میں پیپلزپارٹی نے ترقیاتی کام نہیں کرائے تو یہاں کیا کام کرائے گی۔

جبکہ بلاول بھٹو زرداری کو اب بھی اس بات کا یقین ہے کہ 8 فروری کو پیپلزپارٹی کو ووٹ دیکر نئی تاریخ رقم کریں گے۔

بینظیر بھٹو کی صاحبزادی آصفہ بھٹو پہلی انتخابی مہم میں متحرک نظر آئی ہیں اور بلاول بھٹو کیلئے مہم چلا رہی ہیں۔

چیئرمین پاکستان پیپلز پارٹی (پی پی پی) بلاول بھٹو زرداری کی ہمشیرا آصفہ بھٹو نے کہا ہے کہ بلاول بھٹو کو موقع دیں کہ آپ اور آپ کے حقوق کے لیے لڑسکے۔