نگران وزیرِ اعظم انوار الحق کاکڑ کا اسلام آباد اور راولپنڈی کے مختلف پولنگ اسٹیشنز کا دورہ

نگران وزیرِ اعظم انوار الحق کاکڑ نے اسلام آباد اور راولپنڈی کے مختلف پولنگ سٹیشنز کا دورہ کیا۔

 وزیرِ اعظم نے انتخابی عمل اور ووٹرز کو فراہم کردہ سہولیات کا جائزہ لیا۔ انہوں نے انتخابی عمل میں امن و امان اور ووٹرز کو فراہم کی گئی سہولیات پر اطمینان کا اظہار کیا۔

وفاقی دارالحکومت میں ایک پولنگ اسٹیشن کے دورے کے موقع پر نگراں وزیراعظم انوار الحق کاکڑ کا کہنا تھا کہ مجھے نہیں پتا کہ موبائل فون سروس بند ہونے کی وجہ سے شہریوں کو کیا مشکلات درپیش ہیں، تاہم  اسے سیکورٹی تناظر میں دیکھنا چاہیے۔

انہوں نے کہا کہ ملک میں دہشت گردی کی لہر ہے، بہت سی جگہوں پر سکیورٹی تناظر میں کوئی فیصلہ کیا گیا ہے، اسے اسی تناظر میں دیکھنا چاہیے۔ پولنگ اسٹیشن کے دورے کے موقع پر نگراں وزیراعظم کو پریزائیڈنگ اور اسسٹنٹ پریزائیڈنگ افسران کی جانب سے بریفنگ بھی دی گئی۔

نگراں وزیراعظم کا کہنا تھا کہ انتخابات کے ٹرن آؤٹ کے حوالے سے کوئی بھی بات کرنا قبل از وقت ہوگا۔