9 مئی جلاؤ گھیراؤ کیس، عمر ایوب کی عبوری ضمانت منظور

لاہور کی انسداد دہشتگردی عدالت نے 9 مئی جلاؤ گھیراؤ کے پانچ مقدمات میں رہنما پی ٹی آئی رہنما اور سنی اتحاد کونسل کے نامزد اپوزیشن لیڈر عمر ایوب کی 20 اپریل تک ضمانت منظور کر لی ۔

انسداد دہشتگردی کی خصوصی عدالت میں 9 مئی جلاؤ گھیراؤ کے پانچ مقدمات میں عمر ایوب نے گرفتاری سے بچنے کے لیے عبوری ضمانت کی دائر درخواست پر خصوصی عدالت کے جج ارشد جاوید نے سماعت کی۔ عدالت نے عمر ایوب کی پانچ مقدمات میں 20 اپریل تک عبوری ضمانت منظور کرلی۔ 

عدالت نے پی ٹی آئی رہنما کو 50 ہزار کے ضمانتی مچلکے جمع کرانے کی ہدایت کردی ۔

واضح رہے کہ اس سے قبل 15 مارچ کو اسلام آباد کی انسداد دہشت گردی عدالت نے 9 مئی کو احتجاج اور توڑ پھوڑ کیس میں پاکستان تحریک انصاف کے رہنما عمرایوب کی عبوری ضمانت میں 16 اپریل تک توسیع کردی تھی۔

عدالت کے باہر میڈیا سے غیر رسمی گفتگو کرتے ہوئے عمر ایوب نے کہا کہ حکومت کے ساتھ چلنا حکومت کے رویے پر منحصر کرتا ہے۔ دیکھنا ہے کہ حکومت بانی چیئرمین پی ٹی آئی ، بشریٰ بی بی ، شاہ محمود قریشی اور دیگر گرفتار رہنماؤں سے کیا سلوک کرتی ہے۔

انہوں نے کہا کہ جب تک ہمارے گرفتار رہنماء رہا نہیں ہوتے حکومت کے ساتھ سمجھوتہ نہیں ہو سکتا۔ اس حکومت کو معیشت کا زیرو علم ہے ان سے معیشت پر بات کرنے کا کوئی فائدہ نہیں،انہوں نے پہلے بھی ملک کا دیوالیہ نکالا تھا اب دوبارہ وہی کر رہے ہیں۔