چیمپئنز ٹرافی: آئی سی سی کے وفد کا نیشنل بینک اسٹیڈیم کراچی کا دورہ

کراچی: انٹرنیشنل کرکٹ کونسل (آئی سی سی) کا تین رکنی وفد چیمپئنز ٹرافی کے لیے نیشنل بینک اسٹیڈیم میں انتظامات کا جائزہ لینے کراچی پہنچ گیا۔

آئی سی سی کے تین رکنی وفد نے نیشنل بینک اسٹیڈیم کراچی کا دورہ کیا اور سیکیورٹی انتظامات کا جائزہ لیا۔ پاکستان کرکٹ بورڈ (پی سی بی) کے حکام نے آئی سی سی کے وفد کو انتظامات کے حوالے سے مختلف امور سے آگاہ کیا۔

آئی سی سی چیمپئنز ٹرافی اگلے سال فروری 2025 میں شیڈول ہے جس کی میزبانی پاکستان کرے گا۔

آئی سی سی کے ہیڈ آف ایونٹس کرس ٹیٹلی کی قیادت میں وفد کے دیگر ارکان میں سینئر منیجر ایونٹ آپریشنز سارہ ایگر اور ایونٹ آپریشنز منیجر عون محمد زیدی شامل ہیں۔

کراچی اسٹیڈیم کے معائنے کے بعد وفد کو سیکیورٹی فراہم کرنے کے لیے اداروں کے حکام سے ملاقاتیں بھی طے ہیں۔