کسان کارڈ پر نواز شریف کی تصویر لگانے کے خلاف درخواست خارج

لاہور ہائی کورٹ میں کسان کارڈ پر پاکستان مسلم لیگ (ن) کے قائد نواز شریف کی تصویر لگانے کے خلاف درخواست پر سماعت ہوئی جسے واپس لینے کی بنیاد پر خارج کر دیا گیا ہے۔

لاہور ہائی کورٹ کے جسٹس شاہد کریم نے شہری مشکور حسین کی درخواست پر سماعت کی۔

پنجاب حکومت کے وکیل نے عدالت میں بیان دیا کہ ابھی تک کسان کارڈ پر نواز شریف کی تصویر کا فائنل نہیں کیا۔

درخواست گزار کے وکیل نے عدالت میں موقف اختیار کیا کہ سپریم کورٹ بارہا ایسی ذاتی تشہیر سے منع کر چکی ہے، عوام کے پیسے سے اشتہار نہیں دیا جا سکتا۔

جس کے جواب میں وکیل پنجاب حکومت نے کہا کہ ایسا کچھ نہیں ہو رہا، یہ درخواست وقت سے پہلے دائر کی گئی ہے۔

عدالت نے درخواست گزار کے وکیل کو مخاطب کرتے ہوئے کہا کہ اگر پنجاب حکومت ایسا کرتی ہے تو آپ دوبارہ درخواست دائر کریں۔

ہائیکورٹ نے کسان کارڈ پر نواز شریف کی تصویر لگانے کے خلاف دائر درخواست واپس لینے کی بنیاد پر خارج کر دی۔