عدلیہ کی آزادی اور معزز ججوں کے خط پر سیاست نہیں کریں گے ، اعظم نذیر تارڑ

وزیر قانون اعظم نذیر تارڑ نے اسلام آباد ہائی کورٹ کے ججوں کی طرف سے پاکستان کے چیف جسٹس کے نام ایک خط میں اٹھائے گئے معاملات کی تحقیقات کیلئے انکوائری کمیشن کے قیام اور سابق چیف جسٹس پاکستان تصدق جیلانی کو کمیشن کا سربراہ مقرر کرنے پر ملک بھر کی منتخب وکلاء تنظیموں کی حمایت کی تعریف کی ہے۔

انہوں نے ایک بیان میں کہا کہ ملک کی سب سے بڑی وکلاء تنظیم ''پاکستان بار کونسل'' اور سپریم کورٹ بار ایسوسی ایشن کا اعلامیہ اس بات کا غماز ہے کہ یہ تنظیمیں آزاد اور غیر جانبدار عدلیہ کے حوالے سے سنجیدہ ہیں۔

انہوں نے کہا خیبر پختونخوا بار کونسل، پنجاب بار کونسل، اسلام آباد بار کونسل، پشاور ہائی کورٹ بار، ایبٹ آباد ہائی کورٹ بار، لاہور بار ایسوسی ایشن، ملتان ہائی کورٹ بار اور بہاولپور ہائی کورٹ بار نے بھی کمیشن کے قیام اور تصدق حسین جیلانی کی بطور کمیشن سربراہ تعیناتی پر اعتماد کا اظہار کیا ہے جو کہ ایک مثبت پیشرفت ہے۔اعظم نذیر تارڑ نے کہا کہ حکومت سچ عوام کے سامنے لاناچاہتی ہے تاکہ مستقبل میں ایسی شکایات کا سامنا نہ کرنا پڑے۔

انہوں نے وزیراعظم شہباز شریف کی قیادت میں حکومت اور کابینہ عدلیہ کی آزادی اور آئین کے تحت اختیارات کی تقسیم کے اصولوں پر یقین رکھتی ہیں۔انہوں نے کہا عدلیہ کی آزادی اور اسلام آباد ہائی کورٹ کو معزز چھ ججوں کی طرف سے لکھے گئے خط پر سیاست نہیں ہونا چاہئے۔