ٹی 20 ورلڈ کپ، قومی کرکٹ ٹیم نیویارک سے فلوریڈا پہنچ گئی

قومی کرکٹ ٹیم نیو یارک سے فلوریڈا پہنچ گئی، جہاں 16 جون بروز اتوار آئرلینڈ کے ساتھ میچ ہو گا۔

پاکستانی ٹیم آج آرام کرنے کے بعد شام میں انٹرنیشنل کرکٹ کونسل (آئی سی سی ) کرکٹ فار گڈ سرگرمی میں حصہ لے گی۔

پاکستان کا گروپ اے میں آخری میچ 16 جون کو فلوریڈا میں آئرلینڈ کے ساتھ کھیلا جائے گا۔

ذرائع کے مطابق 16 جون کو شیڈولڈ پاکستان اور آئرلینڈ کے میچ میں بارش کے کافی زیادہ چانسز ہیں۔

یاد رہے کہ گزشتہ روز نیو یارک میں کھیلے گئے میچ میں پاکستان ٹیم نے ٹورنامنٹ کی پہلی فتح حاصل کی، پاکستانی کرکٹ ٹیم نے کینیڈا کو 7 وکٹوں سے شکست دی تھی۔

واضح رہے کہ پاکستان کے گروپ اے میں پہلے 2 میچز میں شکست کا سامنا کرنا پڑا تھا، پہلا میچ   امریکہ جبکہ دوسرا میچ بھارتی ٹیم نے 6 رنز سے ہرایا تھا۔