سیالکوٹ میں زمین کے تنازع پر فائرنگ: ایک خاندان کے 5 افراد جاں بحق

سیالکوٹ: سیالکوٹ کی تحصیل پسرور کے گاؤں سگنال میں زمین کے تنازع پر فائرنگ کے نتیجے میں ایک خاندان کے 5 افراد جاں بحق ہو گئے ہیں۔

پولیس کے مطابق، 42 سالہ محمد جاوید اپنی اہلیہ 39 سالہ رقیہ اور بیٹیوں 15 سالہ فاطمہ اور 26 سالہ ارم کے ہمراہ کھیتوں میں کام کر رہے تھے جب مبینہ طور پر اعجاز اور محمد شہزاد نامی افراد نے ان پر فائرنگ کر دی۔ اس حملے میں جاوید، رقیہ، ارم اور فاطمہ موقع پر ہی جاں بحق ہو گئے۔

پولیس کے مطابق جب 52 سالہ رشیدہ بی بی نے ملزمان کو روکنے کی کوشش کی تو اس پر بھی فائرنگ کی گئی جس کے نتیجے میں وہ زخمی ہو گئی۔ زخمی کو فوری طور پر ہسپتال منتقل کیا گیا لیکن راستے میں ہی دم توڑ دیا۔

پولیس کا کہنا ہے کہ اس واقعے کی وجہ زمین کا تنازع اور سابقہ مقدمات ہیں۔ پولیس نے ملزمان کی گرفتاری کے لیے چھاپے مارے ہیں اور تحقیقات شروع کر دی ہیں۔