پاکستان کے 78 ویں یوم آزادی کے موقع پر گوگل بھی پاکستانیوں کی خوشیوں میں شامل

پاکستان کے 78 ویں یوم آزادی کے موقع پر سرچ انجن گوگل بھی پاکستانیوں کی خوشیوں میں شامل ہے۔

سرچ انجن گوگل اکثر و بیشتر اہم دنوں اور اہم شخصیات کی سالگرہ وغیرہ کے موقع پر انہیں خراج تحسین پیش کرتے ہوئے اپنا ڈوڈل تبدیل کرتا ہے اور ایسا ہی پاکستان کے یوم آزادی پر بھی کیا گیا ہے۔

یوم آزادی کے موقع پر آج گوگل نے اپنے ڈوڈل کو نیا رنگ دیا ہے اور پاکستانیوں کی اس آزادی کے دن کو نا صرف سبز ہلالی پرچم بلکہ پاکستان کے مشہور آم اور  ٹرک آرٹ سے سجایا ہے۔

جب کوئی بھی اس سرچ انجن کو استعمال کرنے کیلئے کھولے گا تو اسے یہ ڈوڈل نظر آئے گا اور اسے کلک کرنے پر یہ گوگل کے مین پیج پر بھی دیکھا جاسکتا ہے۔

واضح رہے کہ پاکستان میں اس وقت آم کا سیزن جاری ہے اور دنیا بھر میں پاکستانی آموں کو خاص اہمیت حاصل ہے جب کہ پاکستان کے ٹرک آرٹ نے بین الاقوامی سطح پر کافی مقبولیت حاصل کی ہے۔